الثلاثاء، 20 أغسطس، 2013

غَـيّـرها .. الجلسة الاولي ..

الكلمات  اللي بين ايديك دي مش روشته علاج و لا مرجع علمي او طبي او حتي ديني ..
اولا انت سليم .. لو كنت بتسأل يعني .. يمكن مش 100 100 .. بس انت سليم 
بديل انك عارف ان فيه حاجة محتاجة تغيير (ع حد تعبيرك) و انا مش بتكلم من منطق الطبيب و لا العالم بامور الغيب .. 
بما انك حاسس ان حياتك فيها حزن و فيها شئ من الخوف و الزعل و عدم الاطمئنان ده بيخليك في حد ذاتك سليم طالما استشعرت الكلام ده كله :) شوفت الموضوع ببساطه اهو
إتفقنا علي التعمق ..
اول حاجة انت محتاج تعرفها انت مين ! و نفسك دي عاملة ازاي .. شكلها عامل ازاي ..
اول حاجة لازم تجهز للقاء خاص ..
اختار المكان المناسب عشان تتكلم معاها ..
اختار مكان لنفسك !! ايوة .. اختار المكان المناسب المحبب لقلبك عشان تتكلم معاها ..!!
جواك كده اختار .. ممكن قعدة جميلة علي ضوء الشموع مع موسيقي هادية ..
او حتي تمشية ع البحر ساعة مغربية ..
و لا علي كنبة وثيرة مليانة دباديب !!
انت اللي حتحدد ايه اكتر مكان انت بتحبه و بترتاح فيه ..
خدلك في خيالك مكانين ..
مكان لشخصين ..
انت مع نفسك ..!
هي حتيجي دلوقتي .. نفسك من غير كل المكياج اللي انت بتحطهولها كل يوم ..
نفسك المجردة ..
فسك اللي علي سجيتها .. بعقلية طفل في الثالثة من عمره و حب المولود لأمه .. و عشق المحبوب لعشيقته ..
نفسك اللي عباره عن كتلة من المشاعر .. من غير قيود من غير اي حاجة تفسد طبيعتها ..
اول ما تحاول تفتكرها كده ..
بص في وشها .. يمكن لسة حتلاقي كام قناع عليها ..
يمكن تلاقي وشها مليان ردوش و خدوش ..
يمكن تلاقي وشها فيه حزن و دموع ..
و يمكن تلاقيها ساكته مبتتكلمش ..
ممكن تلاقيها عاوزة تترمي في حضنك ..
ممكن تلاقيها شاردة و مش عاوزة تبص في عينك حتي ..
المهم انك تحاول تشوفها ..
افتكر كل حاجة كنت بتحبها من و انت صغير كده ..
كتاب قديم و لا لعبة و لا حتي فيديو جام ..
افتكر اكتر لون كنت متعلق به .. اكتر شغلانه كان نفسك فيها و انت عندك 6 سنين ..
افتكر كده و انت بتستهجا الف باء ..
افتكر كده اكتر اغنية حبتها و رقصت عليها و انت صغير ..
افتكر لمة اولاد الجيران  حواليك زمان ..
لمة عيلة و قرايب ..
صديق حاطط دراعه ع كتفك ..
سندوتش اتقاسمته مع حد بتحبه ..
اول بوسة اديتها لحد او حد اديهالك  و انت صغير و كنت خجلان  ..
طيب اكتر جول دخلته لما كنت بتلعب في الشارع ..
لما كنت بتفرقع البومب و الصواريخ ..
طيب لما كنت بترسم في الكراسة ..
لما كنتي بتقلدي مامتك .. او اختك الكبيرة ..
اول مرة حطيتي فيها روج ..
اول مرة حلقت فيها دقنك ..
اول مرة كنت عاوز تبكي ع البحر ..
اول ما كنت بتسمع ان بكره اجازة .. و آخر يوم امتحانات ..
اول ما كنت بتستني مسلسلك المفضل .. اكتر فيلم كنت بتحبه ..
اكتر حد كنت بتحب تشوفه و متعلق به و انت صغير..
اكتر لعبه كنت حريف فيها ..
ها ؟؟ ايه رأيك ؟؟
مش قربت تشوفها ..
طيب اهي قدامك ..
كلمها بقي .. 
قوم .. احترمها و قعدها ع الكرسي اللي قدامك ..
متندفعش في اللقاء معاها ..
ممكن تسيبك للأبد ..
قعدها في المكان اللي تختاره هي .. اصلها ممكن تغير المكان ..
قوم اطلب لها حاجة ..
مش لازم تكون حاجة تشربها ..
ممكن تكون حاجة بتحبها ..
دور في اوضتك ..
في درج دولابك .. في مكان كده انت شايل فيه حاجات ليك من الصغر ..
انا عارف المكان ده .. اللي فيه ورق مطبق و فيه كام ميدالية علي كام هدية ..
و لا فيه موضوع تعبير من 15 و لا 20 و لا حتي 30 سنة ..
فيه رسمه ليك .. فيه حاجة كنت شايلها من و انت صغير ..
لعبة و لا دمية ..
لو ملكش خلق تدور ..
روح امسك البوم صور عيلتك ..
و افتح اول صورة كنت بتضحك فيها و انت في جنينه الحيوانات ..
 و لا في المدرسة بالمريلة ..
اسحب حاجة من دول كده .. و خليها جنبك ..
اديها لنفسك .. اطلب منها انها تبص فيها .. انها تحتويها ..
انها تسرح و تفتكر الايام الجميلة دي ..
اديها حاجة من اجمل الحاجات اللي كنت بتمتلكها بنفسك ..
خلاص اديتلها الهدية و قعدتها في اقرب مكان حلو ليك و لنفسك ..
انا عارف ممكن تكون بينك و بين نفسك متأثر او الموضوع ميفرقش معاك لسه ..
بس اللي متأكد منه انك عندك اجمل مكان بتحبه ..
و عارف كمان انك عندك اجمل ذكري ملموسة ليك و انت لسه بمنتهي البراءه ..
قبل الزمن ما يرمي التراب و حمله التقيل عليك ..
متبخلش علي نفسك ..
انك تبدا معاها الكلام ..
انك تشوف جواها ايه اللي مخليها حزينة اوي كده ..
بس متسألش سؤال مباشر ..
عشان الاجابة حتوصلك بطريق غير مباشر ..
تحب تشغلها اغنيه ايه دلوقتي ؟؟
انت بتتريق عليا ؟ و الله مش خسارة فينا ننا نحب نفسنا .. و ندلعها ..و نكلمها كمان ..
مش خسارة اننا نحضنها اوي في الوقت ده ..
اسيبك في اول جلسة كده مع نفسك ..
ايه ؟؟ آه..  انت كنت مفكر ان الجلسة دي حتبقي معايا و تمدد بقي ع الشازلونج و الحوارات دي ..
لا طبعا .. انا مليش ف الكلام ده و لا مؤهل له ..
انا اصلا معرفش ايه اللي حيدور ما بينك و ما بين نفسك ..
كل اللي اعرفه انك قاعد بعيد في حته معرفهاش عنك .. انت بس اللي تعرفها ..
و قاعد مع حد كان هو نفسه يبقي معاك اللحظة دي ..
اعتقد من الرخامة اني اطول ..
و مش حطلب اتنين لمون .. انا معرفش انت محتاج ايه ..
و لا هي بتحب ايه ..
و زي ما قولتلك اتأمل فيها و بص عليها كده .. و بلاش تسأل ع طول .. 
استمتع باللحظة ..
عن اذنك !
M.Sultan


الأحد، 18 أغسطس، 2013

غَـيّرها .. قبل الجلسات

الحياة و الدنيا و اللي حوالينا ..
كل يوم حاجة فينا بتتغير و كل يوم حاجة فينا بتروح و حاجة بتدخل حياتنا ..
المتغيرات كتير و الدوائر اكتر .. و تاهت وسطنا معاني و حاجات كتيرة بقالنا كتير مشوفنهاش ..
الزمن و الوقت و الحياة ,  الملل و الحزن و الاكتئاب ,  الحلم و السعادة !
كل حاجة اتمنيناها .. و كل حاجة ماخدنهاش .. و كل حاجة حلمنا انها تبقي عندنا و معرفناش ..
كل ضحكة و كل دمعة و كل لحظة غضب او لحظة انتظار ..
انت بتتخنق .. مش شايف غير الرمادي .. اي نعم مش ع طول .. بس مسيطر ع اغلب اوقاتك ..
 وبتقول اتخنقت . تعبت .. محدش داري بيا غير اللي خلقني ..
نفسي اغير حياتي دي !! 
و كام مرة مسكت فيها  ورقة و قلم  كتبت انت عاوز ايه .. 
كا مرة ريحت ضهرك لورا او حتي قبل ما تنام و انت بتتخيل نفسك ايه ؟
بتهرب من الواقع كام مرة ف اليوم ؟
بتحلم بأيه و مش قادر تستغني عنه ؟
كام مرة لفت انتباهك كاتب في السوق اسمه غير حياتك و لا  الرضا وا لسعادة و لا حتي كتاب كيف تصبح مليونير !!
بدور ع السعادة في حياتك ..
او عاوز تحقق الحلم اللي جواك ..
حلم انك تبقي واحد تاني غير الواحد اللي قدامك ..

فيه زعل بيكسر الواحد اوي .. ده بيبقي سبب
و ساعات الواحد لما بيفرح مبيقاش عاوز الوقت يعدي و ممكن يحسد نفسه ع الشعور اللي طلع منه ده !! و ده كمان سبب
و ساعات مبيكونش فيه سبب عشان التغيير غير انك مش راضي .. و ده في حد ذاته سبب و لو حتي اللي حواليك قالك احمد ربنا ع النعمة اللي انت فيها دي غيرك مش لاقيها ..

حتقولي عاوز اتغير .. حقولك عاوز تتغير لإيه ؟
كاره نفسك ليه كده اوي ؟
اصل انا فاشل مش ناجح ..
اصل انا اتجرحت في الدنيا دي كتير .. اصل انت مش حتفهم اللي جوايا ..
اصلي كان نفسي اعمل حاجات كتير اوي و معملتهاش !
حقولك ياتري الحاجة اللي عاوز تعملها دي هي فعلا اللي عاوز تعملها ؟
ياتري انت فاشل فعلا .. طيب و لو انت حاسس بالفشل كده و عاوز تغير من نفسك تبقي فاشل ازاي ؟؟ !!
حتفولي الظروف اللي حواليا و الاوضاع و كان نفسي اتولد حد تاني او كان نفسي ادخل الكلية الفلانية .. طب عارف كان  نفسي اكمل مع الشخص ده حياتي دي .. او .. او .. حقولك و هو انت يا صديقي حتغير الظروف اللي خلاص وقتها عدي و فات ؟ و لا انت لما كان عمرك يوم كنت بتختار حاجة ؟
اتعمق معايا ..
حبه تعمق ..
تعالي جواك و جوايا نتعمق ..
مفيش حاجة اسمها كتالوج للتغيير .. انت مش حتغير بوجيهات عربية ..
مفيش حاجة اسمها اسال حد يعرف اكتر مني ..
انت تعرف اكتر من اي حد ربنا خلقه عن نفسك ..
انت الواحيد اللي دخلت نفسك و سبحت جواها و عارف انت عاوز ايه ..
طيب الفكرة ايه ؟

الفكرة انك لازم تقعد مع نفسك و تتعرف عليها و تتكلم معاها ..
مش جنون و الله ..
بخطوات بسيطة من حد مش عاوز يخليك تشتري كتابه و لا تتفرج ع برنامجه و لا عاوز منك اي حاجة غير انه عاوز يساعدك ..
عارف ليه ؟
حبقي اقولك في اخر جلسة (لو تحب تسميها جلسة علي غرار الاطباء النفسيين) ..
بس دي مش جلسة علاج ..
دي جلسة بينك و بين حد طول عمرك مفكر انك تعرفه و تكتشف فجأة انك متعرفش عنه حاجات كتيرة ..
الحد ده نفسك .. و الحد ده ممكن يكون فيه ناس شايفاه اكتر منك .. بس متعرفهوش زيك ..

تعالو كده نوطي صوت الدنيا ...
و نقفل علي نفسنا صياح الوقت و الزمن ..
كام سطر اتعمل ليك انت .. لهدف واحد و هو انت !!
خدهم لنفسك .. احضنهم جامد اوي في قلبك..
اهدي و اركز و انسي حالة الغضب اللي عندك .. و انك مش راضي ع نفسك ..
او حتي الغرور مخليك مش عاوز تعترف انك مش راضي حتي !
لو بدأت تريقة او امتعاض او حتي تكذيب..
فانت مش خسران حاجة .. و انت لو قريت الكلمتين دول في الاول ..
حتلاقي نفسك عاوز تقرا للنهاية .. و النهاية ..
جاهز ؟؟
متأكد انك جاهز ؟؟
ع بركه الله 
!!!