الأربعاء، 20 يونيو، 2012

تحت سلم عمارة (التدوينة رقم2)

راجع من عند خطيبتي و ماشي في الطريق بسرعة حبتين .. إستوقفني منظر صغيرتحت سلم عمارة خلاني اهدي .. بنات البواب و صحباتهم.... بنتين كبار عندهم 7 او 8 سنين تقريباً قاعدين يستهجوا كلام كتاب المدرسة .. لسه مستلمين الكتاب شكلهم (الكلام ده كان اول الدراسة اكيد يعني) و عمالين يقولو كلام اطفال: انا خلصت كل الكتاب النهارده .. ده مفيهوش حاجة خالص و البنت ترد عليها و انا خلصته من السنة اللي فاتت اصلاً.. اما اللي لفت نظري طفلة صغيرة كده حوالي 4 سنين .. مسكت ورقة مرمية في الشارع عشان تجري عليهم و تعمل نفسها كبيرة و تقولهم انا قريت الورقة اهو .. مفيش حد احسن من التاني .. راحوا البنات بخباثة قالولها ياسلام طب اقريهالنا كده .. راحت عملت نفسها بتقرا و تقول اي كلام و اللذيذ في الموضوع انها كانت ماسكة الورقه بالشقلوب اساساً.. ضحكت و انا ماشي بعد ما شوفت الموقف ده و افتكرت ايام المدرسة و ملمس التكت و وقفة الطابور عشان نجيب الكراسات و نسأل الابلة نجيب كشكول 80 ورقة و لا 60 و الجلاد لونه ايه .. و افتكرت الزمزامية و ريحة الكتب اللي نازلة طازة من المطبعة و الخوف من الاستاذ و هو بيسمع كلمة قاموس بالانجليزي ع السبورة .. ياااااااه كانت ايام و الله .. افتكرت كمان إننا كلنا عندنا حب التقليد .. زي البنت الصغيرة عندها حماس محدش يبقي أحسن منها.. و تثبتلهم انها بتعرف تقرا عادي جدا .. و ان الصح ان الواحد يكون متفوق .. و افتكرت نفسي زمان لما كنت ببص بقرف للواد اللي كان بيبقي الأول ع الفصل ع طول .. و قولت طالما اتغرس فينا كلنا من و احنا اطفال حب النجاح و نزعل اوي لما نفشل و ازاي كنت بداري من ابويا الكحكة إياها في الشهادة و اقعد ساعتين عشان ازور الامضاء بتاعته عشان و لو عرف تبقي العملية عنب خالص .. هو احنا الي اتغيرنا و لا المشاعر اللي جوانا اتغيرت للحاجة دي ..؟ كملت طريقي للبيت مشي بسأل نفسي .. طيب يمكن العيب في اننا مش بنحس بقيمة الشهادة .. يعني دلوقتي انا ممكن أحسد ميكانيكي ع مكسبه و لما كنت صغير كنت ابصلة و هو بلية علي انه غلبان و اتحرم من التعليم.. يمكن يكون ده السبب.. و يمكن يكون ان العلم نفسه ملهوش قيمة او مش بنحس بمردوده .. بنسمع كتير عن ناس سافروا بره و اثبتوا نفسهم في اصغر معامل هناك.. و لا العملية كان السبب فيها اصدقاء السوء .. طيب اصدقاء السوء دول برده مكانوش كده ليه في اولي اول ؟؟ طيب لو الدنيا كده يبقي لما اتعلمنا كنا بنضيع وقت و مجهود و اتملينا قرف من غير فايدة .. بس برده مقولتش كده عشان لما إفتكرت ان فلان الفلاني اللي ممكن مياكولش عشان يعلم اولادة عشان إتحرم من التعليم .. قولت بس حل الموضوع ده هو الفخفينا .. يعني كل العوامل دي داخلة في بعضها .. ثقافتنا , مع مستوي التعليم , علي نظرة المجتمع للعلم , و تدني اجور المتعلمين و اصحاب العلم , و عدم توجيه قدرات الأطفال ع المجال اللي بيحبوه علي حبه صوص من رفاق السوء عمل الفخفينا دي .. وقفت مرة واحدة و انا ماشي.. لما سألت نفسي سؤال اترعبت منه بجد ..هو مصير عيالي حيبقي ايه بالظبط ..؟؟ يعني حدخلهم مدرسة خاصة و لا لغات و لا حكومة .. و لو دخلتهم لغات أو خاص (ده ع اساس بقي اني حبقي من ذوي الاربع عجلات او احرم نفسي من الاكل زي فلان الفلاني) حيبقوا مدلعين و سيس و لا لو دخلتهم مدارس حكومة .. و يجي يعمل حاجة غبيه يقولولي آدي نهاية التعليم المجاني .. مع اني بسأل نفسي ليه فيه تعليم مجاني و خاص و 5 نجوم ..؟ ليه التعليم ميكونش حاجة واحدة يعني .. آه نسيت معلش .. عشان مينفعش كل العيال يبقوا في مدرسة واحدة .. مينفعش ابن البواب و لو يجي منه يبقي جنب ابن صاحب العمارة و لو كان بيعملها ع نفسه .. لازم العزل .. لازم الفصل .. لازم نفترق من و احنا اطفال و نتعلم الفرق كويس عن غيرنا .. إفتكرت عيال البواب (مع الاعتذار ليهم) لو عرفوا يفكوا الخط بعد كده يبقي عملوا خير .. 


هناك 11 تعليقًا:

  1. وكم من ابن بواب تفوق على ابن صاحب العمارة
    بس العيب في النظام , كل العوامل اللي ذكرتها دي يا محمد سببها النظام
    النظام اللي دمر التعليم و صنع معدومي الدخل
    النظام اللي صنع الطبقية بكل اشكالها
    النظام اللي خلى مرتب الدكتور الجامعي و المدرس و الموظف العام من ادنى الدخول

    نظام سرطاني او فخفخينا فساد
    تسلم ايدك يابو السلاطين :)

    ردحذف
  2. تسلملي يا عثمان .. عندك حق في كل حرف

    ردحذف
  3. صباح الخير

    التغير ؟؟؟ الاكيد اننا كل مابنكبر بتغير اه بيفضل فيا بعض مما كان اه الاسس انما الفكر العالم والاولويات والميول بتتغير كل ما هتكبر هتلمس دا بنفسك

    باقى الاسئله ليه ليه ليه ؟؟؟؟؟؟؟ لانك فى اكيييييييييييد فى مصر

    جميل بوستك بالتوفيق ومن حسن لأحسن

    ردحذف
  4. ذكريات المدرسة ونحن أطفال عالقة في البال لا تنتهي ..

    استمتعت بالقراءة .. وان شاء الله من المتابعين لكل جديد.

    ردحذف
  5. richardcatheart نورتني بجد يا جميل.. هههههههه انت اكيد في مصر و عشان كده انا عملت الإستعراض البسيط ده ..

    ردحذف
  6. وجع البنفسج : بجد انا سعيد جدا انها عجبتك و يشرف مدونتي وجودكم

    ردحذف
  7. كلنا بنتغير اكيد و لما بنفتكر نفسنا ايام المدرسة او نشوف ولد صغنننفتكر نفسنا و احنا قده

    بس احساسي يتلخص ف حاجتين ، اما بقول الله لا يرجعها ايام او بقول يااااه قد ايه ياما هيشوف

    مكنتش ايام سودة بس اصلها الخطوة الاولى اللي علمتني ان فيه فرق بين ابن البواب و ابن صاحب العمارة ، و دة اسوء حاجة في بلدنا او خلينا نقول بلداننا لاني اكتشفت لما كبرت انها مش عندنا بس

    عجبتني مدونتك

    سلامي

    ردحذف
  8. تسلمي يا إيمي .. بس برده في ايام بنقول فيها الله كانت ايام

    ردحذف
  9. منتظر جديدك إن شاء الله

    ردحذف
  10. لك كل الحق

    لدينا صروح تعليميه رائعه .. ولكن من أنشأها لا يبالي .. إلا بالتفاخر بهندسة المباني

    تحياتي ..
    دمت بخير

    ردحذف
  11. دمتي بكل ود و تسلمي ع تواجدك .. و اتمني يكون دائم

    ردحذف