الخميس، 21 يونيو، 2012

إطمن .. المصيبة حتخليك كاتب !! التدوينة رقم-3-

    ايوة اطمن .. مش عارف حتطمن إزاي و انت عندك مصيبة .. بس عزايا الوحيد ليك ان المصيبة ممكن تطلع منها بحاجة كويسة .. بص للنص المليان .. اصل المصيبة بتخلي عندك فيضان متدفق من الاحاسيس .. و بتخليك من غير ما تحس تمسك القلم , و مرة في مرة حتكتشف انك بقيت كاتب بحق و حقيق ..!! لكن مش كل الكتاب إتعرضو لصدمة .. لو جا السؤال ده في دماغك .. حقولك أكيد طبعاً .. ما الكتاب نوعين .. نوع بيتصطدم زي حالاتك و نوع بيعيش لحظة الصدمة في مخيلته .. منطق غريب مممم.. بس حللها معايا كده .. اول ما بتحصلك مصيبة بتتألم اوي و خصوصا لو كانت مصيبة عاطفية او مادية او حتي سياسية المهم ان المصيبة تستحق لفظ مصيبة !! يعني ايه مصيبة بالمناسبة ؟؟ آه المصيبة دي او الإبتلاء او الكارثة او او او ..ايا كان هي في رأي حاجة بتخلي حياتك تنحرف عن مسارها الطبيعي.. حاجة بتخلي الحاجة اللي انت متعود عليها تروح من إيديك و تتعود ع حاجة او وضع جديد.. وضع انت مش متعود عليه و بالتالي بتكون حالتك النفسية غير مستقرة .. و بالتالي بيتخلق عندك شعور بالألم الرهيب .. اللي بيخليك عاوز تفصح عن اللي جواك و تقول للناس كلها انك بتتألم بصورة مباشرة او غير مباشرة عشان كده بنحس اوي بقيمة مناجاه ربنا و قيمة الاهل و الاصحاب طبعا في الوقت ده .. و بعد كده تيجي مرحلة التدوير .. تقعد تدور ع الناس اللي حواليك من غير ما تحس اللي عاشوا الحالة دي زيك و الناس اللي ماعشوهاش ده انت ممكن تدور علي اغنية بتعبر عنك و انت عارف انها في الآخر مجرد أغنية .. و تبدأ تتكلم مع الناس دي و تحسسهم اللي جرا .. و لو ملقتش بتمسك قلمك عشان تكتب و تدون اللي جرا يمكن يلاقوه بعد الف سنة في الحفريات و يتألموا زيك .. نظرية نقل الألم إياها .. شايفك بتسأل سؤال تاني : طب ليه فيه ناس كتير بتصطدم و برده مش بيبقوا كتاب ..؟؟ الإجابة في ان الموضوع بيبقي موجه ..يعني فيه واحد تلاقيه بيمسك اقرب مطواه و ينزل ناوي يتعارك مع حد .. و واحد بينزل يصلي في المسجد لحد الفجر .. وواحد بيدخل في دور إكتئاب رهيب لحد ما ريحته تبان .. يعني لو انت متعود ع القراية حتكتب و لو متعود ع الخناق حتمسك المطوة اللي بقولك عليها دي .. بس في النهاية برده حتلاقي كل الناس ممكن لو مسكت قلم في اللحظة دي حتكتب اقرب كلمات صادقة نحسها بقلوبنا و لو كانت مجرد شخابيط !! و لو انت من النوع اللي فكر انه يعبر بالقلم .. و طلع منك كلمتين .. و لقيت نفسك ارتحت لما خرجو من حرقتك.. مش حقولك نمي القدرة دي فيك إنت مش مستحمل الكلام ده لإن انت في مصيبة و لا نسيت !! .. بس حقولك خلي القلم يلاقي طريقته في انه يريحك .. اكتب .. اكتب اوي .. بكل قوتك و بكل قدرتك و طلع اللي جواك .. عشان تحس انك (+) كل حاجة كتبتها (=) انت (-) المصيبة اللي جاتلك .. و ابالتالي حتحس نك لسه طبيعي و حياتك طبيعية و مفيش حاجة غيرت مسارها .. و عارف بقي لو المؤثر اللي كان مأثر عليك انتهي قبل اما انت تتعود عليه .. حتلاقي نفسك بتكتب عن الجمال و الألوان من غير ما تحس .. ساعتها حتعرف انك بقيت مختلف .. و ان عندك موهبه كانت في الأصل مصيبة خطيرة .. مش نظرية برده :) 


هناك 13 تعليقًا:

  1. نظريه طبعااا
    ربنا يديم عليك نعمة الكتابه
    اسلوبك مميز جدا
    تحياتي :)

    ردحذف
  2. انا بحس فعلا ان الابداع مش بيطلع الا لما الواحد يكون فى حاجه فى حياتها مضايقاه
    مصيبه بقى او حتى مود وحش
    كله بيطلع فى الكتابه :)

    ردحذف
  3. صح جداااااااا ...انا قبل كده مكنتش متخيلة ابدا اني ممكن في يوم من الايام امسك قلم واكتب اي حاجة بس بجد اكتشفت ان الكتابة بتريح كتير اوي اوي ومش صعبة زي ما الناس متخيلاها او ان لازم تكون بموهبة والكلام ده
    الكلمات البسيطو ساعات كتير بتبقى احسن وبتوصل الفكرة افضل لأنها بتكون صادقة

    اسلوب حضرتك مميز جدا .. تحياتي

    ردحذف
  4. shaza waheed
    تسلمي بجد .. و شكرا ليكي .. تحياتي

    bent mn elzaman da
    بالظبط كده كله بيطلع في الكتابه و اهم حاجة ان الواحد يطلع اللي جواه و ميكبتهوش

    Nour21
    عندك حق في كل حرف .. تسلمي و متحرمينا من الزيارة

    ردحذف
  5. نظرية برضه
    :))))

    تعرف انا بكتب اجمل ما عندي في لحظات الحزن والاكتئاب حتي اللي مكتوب مش ديما بيعبر عن اللي جوانا ساعات بنكتبه عشان نغير اللي جوانا وده بيكون احساس حلو لما تكتب حاجة حلوة تلمس ناس كتير وانت عارف انه مش ده احساسك دلوقتي

    ولما تكتب اللي حاسه اوي وتبقي حاجة وجعاك وحاسسها جداااا بتوصل برضه للناس بطريقة عجيبة
    انا شايفة الكتابة نعمة كبيرة لينا من ربنا

    يمكن من غيرها كنا نطق نموت

    شكرا علي تدوينتك الحلوة دي

    ردحذف
  6. وجهة نظر تحترم انا كمان اتفق معك ان الضغوط تفجر الطاقات والمواهب اسلوبك جميل وسلس بالتوفيق

    ردحذف
  7. اه و الله
    المصيبة أم الإبداع

    سلامي

    ردحذف
  8. كلام جميل جدا وحقيقي .. خصوصا مع كترة المصايب اليومين دول :(

    ردحذف
  9. مررت بالتجربة دى قبل كده فعلا !
    و فى رأيى إن المصيبة مش بس هتخليك كاتب .. دى ممكن تحول الإنسان الضعيف قائد حقيقى عظيم أو مفكر يفهم الأمور بعمق أكبر
    و لكن اللى بيصنع الفرق فعلا هو الاتجاه اللى بيمشى فيه الواحد فى الوفت ده زى ماحضرتك ذكرت

    ردحذف
  10. هههههههههههههه نظرية بردو

    ردحذف
  11. نهر الحب : اشكرك ع مرورك و ردك و عندك حق اكيد

    wessam22 : شكرا ع الرد جدا و انتظر مروركم و رأيكم دوما

    إيمي 22: اجزتيها في كلمتين فعلا : المصيبة ام الإبداع

    salma hesham: إن الله مع الصابرين :)

    Superbrain: القلم اقوي من المدفع :)

    richardcather : تسلم يا حبي

    ردحذف
  12. أكتب لأتداوى
    ايزابيل الليندى

    عندك حق
    تحياتى

    ردحذف