السبت، 14 يوليو، 2012

آه يا بت يا موزه ... راح اهزك هزه ..!!! التدوينة رقم 25

اكيد مبقتش مبتزل للدرجة دي .. عشان اكتب عن (موزه) او (هزه) و انا معودكم ع الخواطر العامية و الفصحي اللي بتتكلم في مواضيع مهمه ..
بس فعلا .. ايوة .. استفزني اوي الفيلم الجديد اللي اسمه (جيم اوفر) تقريبا .. و الأغنية دي .. اللي انتشرت ما بين الناس ..
بغض النظر عن التدني في الألفاظ .. و بغض النظر عن التدني اللي بقوا فيه الممثلات ..
انا بتكلم عن حقوق ملكية (المكسر) اللي اتعملت عليه الأغنيه دي ..
طبعا الشباب اللي بتركب اي توكتوك محترم او اي شاب بيأجر موتوسيكل و بيعلي السماعات ع الآخر ..
حيعرف ان المكسر مسروق 100 100 ..  و دي مش اول ظاهرة تحصل في الوسط الغنائي ..
إتسرقت قبل كده اغنية (بعرور) العنب العنب العنب .. و غناها سعد الصغير ..
و هكذا .. بنلاقي ان الابتكار (حتي و لو كنا مش قابلينه او عليه ملاحظات) و لو بيلم الناس حواليه بمختلف طوافئهم بينسرق ..
اغنيه تركي تتقلب و تتعمل اغنيه لفضل شاكر .. عادي يعني ..
لما اغنيه برده تتظبط للهضبه عمرو دياب .. ع اساس انها اغنيته .. يبقي احنا عندنا مشكلة اكبر ..
ان مغنيين كبار عارفيين ان فيه اغاني بتتسرق الحانها و بيغنوها ..
حقوق الملكية يا بشر ..
يعني عشان انا واد غلبان و بعمل (مهرجانات) زي ما بيقولو عليها .. يروح سارقها مني واحد عنده شركه انتاج ..؟
عارفين ده مضايقني ليه ..
عشان بحس ان اللي ملهوش ضهر بينضرب ع ضهره ..
دلوقتي بقيت الاقي سواق التوكتوك بقي مشغل اغنية يسرا و مي عز الدين مع اغاني المهرجان ..
محدش بقي عارف حاجة ..  املهم الدوشة شغاله بنفس الرتم بتاعها ..
يعني ممكن انت تعمل حاجة و تلاقي حد ياخودها منك ببساطه عشان هو اقوي منك .. او عشان هو في بلد مش حتعرف انها بتتغني فيها الاغنية دي زي ما حصل مع مطربين كبار ..
و السؤال اللي بيقف قدامي و منرفزني بجد ..
خلاص .. مفش إبداع جديد تقدروا تعملوه ..؟
مبقاش فيه جديد تقدروا تقدموه ..؟
و لا العيب بقي فينا عشان احنا (ألشعب) بقينا نرضي بأي حد يعمل كده ..
و كإنه عااااااااادي اوي ..!!



هناك 4 تعليقات:

  1. والله أنا للأسف شفت الأغنية بالصدفة ع التلفزيون ,, وبصراحة شعرت بالاشمئزاز .. ألهذه الدرجة وصلنا للإسفاف والابتذال ..

    وعلى فكرة كمان عمرو سعد عامل أغنية على نفس الرتم في مسلسل رمضاني جديد .. مش عارفة بتهيألي عن الفلوس وخرم إبرة حاجة زي هيك يعني .. :(

    ردحذف
    الردود
    1. ده قرف
      والله قرف
      الغريب انه يقولك مكسر الدنيا وده اللي عايزة الناس
      مع ان افلام احمد حلمي بتكسر الدنيا وبتكون ليها قصة وهدف ومتقلقش وانت بتسمعه مع اي حد
      مش الافلام اللي بتكون ماسك فيها الريموت عشان متقدرش تشوف اختك الصغيرة تشوف المناظر المهببة دي واللبس الزفت
      نفسي يكون في دور للرقابة صح
      والكلام ده بتاع الاغاني ...
      هو انت شوفت الفيلم بتاع البنت جنا اللي بتغني فيه اغنية هوهو ونونو ده ...؟
      ابقي شوف الكلام ومعناه وازاي يخلوا الكلام ده وبنت طفلة تقول الكلام ده .....بس العيب ف اهلها والعيب ف الرقابة عندنا
      ومتنساش الناس اللي رضيت تسمع القرف ده

      حذف
  2. كلاكم كله صح جداااااااااااا

    ردحذف
  3. أزال أحد مشرفي المدونة هذا التعليق.

    ردحذف