السبت، 23 يونيو 2012

بياع النعناع .. التدوينة الخامسة

الترام واقفه في محطة المعسكر .. و انا مش طايق نفسي و باصص ع الشمال .. لمحت طفل صغير من الشباك , ماسك كام حزمة نعناع و بيبيع فيهم .. وقفة الولد و هو بيبيع كإنه بيخلص في صفقة موبايلات من الصين .. الثقة في الكلام .. قدرته ع التفاوض .. و هو بيضحك في وش الناس اللي باعلها و بيبص ع اللي حيشتري منه بإهتمام .. فكرت نادلته .. و قولتله بكام النعناع .. ضحك و قالي من غير فلوس .. اديتله جنيه و اخدت حزمة من إيده .. راح قالي إستني لحظة .. و راح جاب حزمتين تانين ادهالوملي .. اتكسفت احسسه اني بعطف عليه و لا حاجة .. روحت قولتله و انا بحور عليه: ع فكرة النعناع اللي بتبيعه ده لو تعرف قيمته مش حتبيعه كده .. و انا اعرف حاجة عن قيمته و عشان كده حاديك الجنيه و مش حاخد غير حزمة واحدة..! اخدت الجنيه ببساطة و قالي . بنقبل التبرعات برده .. و ضحك مبينلي سنانه البيضاء و كإن الدنيا دي بالنسبه له لعبه صغير .. إتحرك الترام (اكيد انت بتقول يعني كل ده الترام متحركش..) اه و الله يا أخي متحركش شايفني ححور عليك زي ما حورت ع الواد ..و لما مشي الترام اتخيلت نفسي الواد ده و كإن (ترام) العمر بيمشي بيا .. ياتري حيفقد ضحكته و نباهته دي ؟؟ طيب ياتري عيال الشوارع حيخلوه يشرب و يقلب الناس بدل البيع و الشرا .. و يدخل الاحداث بقي و يطلع مجرم .. و يقولك استاذ جامعي في حوار في تلفزيون 5 نجوم .. أصل المجرم كان ضحية المجتمع .. حاولت ابعد تفكيري السودوي ده من دماغي و اقول الواد ده حيبقي عصامي و حيبقي اكبر مستورد للنعناع من الهند بعد 20 سنة إن شاء الله .. بس التفكير اللي ملهوش لزمة بيقولي صعب من غير ما نراعي العيال دي .. و لو مترعاش حيموت الشاب الصالح اللي فيه أكيد.. ريحت راسي لورا و إستسلمت لصوت عجل الترام ع القضيب و الكمسري (تذكرة.. في هنا تذكره) و بغض النظر عن ان الكمسري بيدور ع التذكرة .. سألت نفسي ياتري مصير الاحلام البرئية و الاولاد البرئية دي ايه فيكي يا مصر ..؟ ياتري بياع النعناع حيطلع مجرم .. و لا حيبقي صاحب شركات (بتاع النعناع المحدودة) .. كل اللي اعرفه اني كل ما اعدي بالترام ابص عليه و اشوفه زي ما هو و لا حد غيره من ضحكته و حتي من نظره عنيه .. و أرجع البيت معايا حزمة النعناع اليومية .. ووالدتي تستغرب مني طبعا .. من امتي بحب النعناع اساساً ..:)

هناك 3 تعليقات:

  1. عجبتنى جدا ...
    وبجد إنت طرحت مشكله خطيره جدا بشكل مبسط


    بالمناسبه لو ينفع تبعتلى حزمة النعناع طالما إنك مبتحبوش :D

    ردحذف
  2. دا فين الولد دا انا بعش قالنعناع اساسا ^^
    المجتمع بيجنى على ناس كتير وبيغيرهم بس فى ناس بتقاوم وناس بتستسلم ودا الفرق بين اللى هيبقى صاحب شركات ( بتاع النعناع المحدوده ) و بين المجرم اللى هيبقى فى الاحداث ..

    ردحذف
  3. hatem saber : نورتني و شرفتني في مدونتي بجد .. تسلم يا جميل .. عندي كتير منه و الله ..

    Meshmesha ana : الخوف من الإستسلام ده و الضغوط قوية انا مش حقولك انا لو مكانه مش حستسلم .. الله اعلم لو مكانه ايه اللي حيجري

    ردحذف