الأربعاء، 27 يونيو 2012

قلب الفلافل يا كابتن .. التدوينة رقم (9)

كل يوم جمعه بعد الصلاة عندي طقس لازم اعمله و لو معملتهوش بحس ان اليوم كده راح اونطة ..  و الطقس ده اني اكل فلافل (او طعمية) و إني انا اللي اجيبها بنفسي .... معرفش ليه لما بشوف عم (محمد) و هو بيعملها بحس ان الدنيا بخير من لونها و هي بتترمي في الزيت .. و بحس بمنتهي الفرح لما بيديني السيخ و يقولي: قلب الفلافل يا كابتن .. ده حتي ساعات بتطوع من نفسي من غير كلام بعد ما يحط الفلافل في (الطاسة) و ابدأ اقلب فيها .. إحساس بالإنتماء .. آه متستغربش .. بحس كده اني وسط اهلي و جيراني .. وسط اللمة الطيبة بعيد عن الشغل و المتملقين و الناس اللي بتتلزق فيك .. الناس اللي حواليك دول بيشاركوك احساس الجوع و نفسهم في الفلافل مش في اي حاجة تانية .. .. و لو يوم جمعه جا و ما قلبتش الفلافل بحب ابص لمنظر الطاسة و الزيت عامل صهد فوق منها و اسرح في الذكريات ..!! معرفش ليه بصراحه الذكريات بتتقلب و الفلافل ع النار ..!! .. اكيد دي ظاهرة صحية إن شاء الله !! .. و ابوخ حاجة بقي لما تلاقي عيل رخم كل شوية .. 2بجني محشية يا عمو .. يا عمووووووووووو .. يا عموووووووو .. و انت واقف عمال تقوله و تهديه كله حياخد يابني .. و هو و لا هنا  :) جميل اوي لما تطلع من النار كده و هي سخنة حتي لو فيه من الدور اللي فات بقول عم (محمد) لا حستني اللي جاي .. ده بيحسسك انك جايب خروف محمر .. و ياسلام لما تتحط في ورق قديم .. و خلي بالك بقي من الحتة دي .. في سيكولوجية غريبة بتربط الورق القديم بالفلافل .. يعني انا واحد من الناس لو الراجل اداني الفلافل في ورقة  جديدة و لا مصنوعه مخصوص عشان تتحط فيها الفلافل بحس اني اضحك عليا .. ياعم فين الورقة اللي الواحد اتربي عليها ..؟؟ الغريب بقي إني لما باكل الفلافل في ساندوتش مبحسش بالطعم اللي بحكيلكم عليه .. او اني اشتريها عجينة و اعملها في البيت بتفقد برده لذتها ..  أكيدربنا بيحلي للناس دي رزقها .. لازم الفلافل تتاكل بعيش بلدي عشان تحس انك اكلت فلافل بحق و حقيق .. 
في الايام الأخيرة دي عملت دايت عشان كنت زايد في الوزن .. كنت بعدي بعد صلاة الجمعة و اتفرج ع الناس و اصبح علي عم (محمد) او اجيب منه الفول بدل الفلافل .. و اقول في عقل بالي : و الله يا جدعان ما بحسدكم .. بالهنا و الشفا  .. من الآخر الفلافل متتاكلش غير كده .. متتاكلش غير مصري .. من ايد واحد مصري .. و في ورق تلميذ مصري .. و في الرغيف البلدي اللي هو طبعا شعار الراجل المصري .. بالهنا و الشفا بقي للي اكل فلافل النهارده او لسه حياكولها .. و بقولها من عندي هنا .. مهما طالت الأيام مش حنسي طعمك يا غالية.. :)



هناك 9 تعليقات:

  1. ولازم تتقلي في زيت العربيات بتاعهم ده اللي مقطوع نفسه :))

    جميلة يا سلطان
    جوعتنا :)

    ردحذف
  2. ولازم تتقلي في زيت المكنة المحروق في سباق الفورميلا خمس مرات..ولا ورق الجرانيل القديمة والحبر يطبع عليها و يدخل معدتك بقى ما اقول لكش على كمية السرطانات و البلاوي اللي بتعرض نفسك ليها...بس مين هو الاكل من عند الناس دي مالهوش حل :) تسلم ايدك

    ردحذف
  3. هههههههههههه
    لا بس حلوة بجد
    بس انا اول مرة اعرف ان الفلافل بتزود الوزن
    ده انا طول السنة دي كنت باكل منها سندوتشين الصبح وانا في الشغل بس وزني زي ما هو لسة برضة 45 ك والا يعني عشان انا شغالة ف مدرسة وطالعة نازلة من الدول الاول للخامس ف اليوم عشر مرات \مش عارفة\بس حلوة التدوينة

    ردحذف
  4. ههههههههههههههه انا دخلت بسبب الصوره اصلا بقي
    وكمان العنوان
    مش اا لوحدي بقي اللي مدمنة طعميه
    انا حاليا مسافره ومن وانا ف مصر وبموووت فالطعميه بتبقي عيد بالنسبالي لما يجيبوها
    فكرتني تدوينتك بنفسي وانا صغيره لم كنت بروح اشتريها بنفسي كل يوم :))
    فكرتني بايام حلوه اوي
    شكرا بقي
    تحياتي :))

    ردحذف
  5. ايووووووووووووووووووون انا بحب اكلها كده
    جوعتني
    بس حلوة اوي اوي اوي
    هات حتة بقى :)

    ردحذف
  6. هههههههههههههههههههههههههههههه انا عجبتني جدا المدونة بجد وانا بحب الفلافل والطعمية وسبحان الله انا كنت لسه بفكر اتغدي بيهم هههههههه

    ردحذف
  7. شكرا ليكم جميعا و الله منورني .. كويس انها عاجبتكم .. تاكلو حته منها بقي ..؟؟

    :) منورني و متحرومنيش من زيارتكم ابدا

    ردحذف
  8. حلوة أوى D:
    بالهنا على قلبك .. بس ماتحرمش نفسك من حاجة دى نصيحتى :))
    قلل الجرعة D: .. زوّد المجهود .. إنما ماتحرمش نفسك من حاجة :)

    ردحذف