بطل قصصك كان مين ..؟؟ التدوينة رقم (13) ..

جوا كل واحد فينا بطل بيحبه مش ممكن ينساه أبدا مهما جري الزمن بينا .. بطل بيفكره بحاجة لما يكبر و يشوف صورته ع غلاف قصة.. حتي و لو كان جد ..
و يقول يااااااه علي الأيام الجميلة اللي كانت من غير قيود و كان الواحد بيسافر في عالم الخيال ..
اكيد كل واحد مننا جواه (بطوط) و (عم دهب) و (عصابة القناع الأسود) .. انا لما بشوف قصة لـ(ميكي) لحد النهاردة بجري عشان اشتريها بحجة اني شاريها لإبن أختي .. و بشتريها و عامل نفسي مش مهتم قدام بياع الجرايد .. و أعيش اجمل مغامرات في (مدينة البط)..
عندك بقي (أدهم صبري) تقريبا كل الشباب اللي بقي عندها 30 او في اواخر العشرينات اتربت علي (رجل الستحيل) و هو بصراحه كان مستحيل في كل حاجة بيعملها عشان كده كنا بنحب نقراله اوي و عارفين انه حيحطم انوف اعداءة كلهم.. و لا(ملف المستقبل) و (محمود) اللي ضاع في العدد رقم (100) و لسم ملقيناهوش .. و حواديت عم (رفعت إسماعيل) اللي مبتنتهيش .. و سفريات (سافاري) و (فانتزيا) .. و المكرونة اللي في كل قصص (المغامرون الخمسة) .. و رقم صفر اللي حيشلني عشان اعرفه في (الشياطين الـ13) ..
كان فيه زمان قصص تبع (المكتبة الخضراء للأطفال) كانت بقي بتوديك لسندريلا والأقزام و ارض العجائب و عقلة الأصبع .. و اللي فاكر سلسلة (أقرأ) .. 
اكيد وقع في إيديك كتاب (فلاش) و قعدت تضحك علي انعرة (علام) و صعب عليك حال تلات اربع الشعب (المواطن المطحون) .. و الجداد كلهم يعرفوا (صرخة الرعب) و (هاري بوتر) كويس اوي ..
عارف بقي .. ان فيه ناس لسه لحد النهارده بتعشق مغامرات (أرسين لوبين) و (هيتشكوك ) و ( اجاثا كريستي) ..؟ و ميتفرجوش علي الأفلام .. بيفضلوا القصص من الكاتب مباشرة ..
طيب فاكر مجلة (ماجد) .. (بلية) .. (سمير) ..(توم و جيري) ..فكر كده و أكيد حتلاقي بطلك الحقيقي اللي كنت ممكن تدفع فلوس الدنيا عشان تبيته في حضنك و انت نايم ..
بجد ايام جميلة .. و الاجمل ان الأبطال دول مش بيموتوا .. عايشين .. مش بيكبروا و لا بيعجزوا .. مش بتتمحي منهم الضحكة .. و يقدروا يرسموا الالاف الإبتسامات من غير ما يكونوا حقيقين .. ده حتي المؤلف بيموت .. و الأبطال مش بتموت .. حد غيره بيكمل .. بنفس الروح .. و بنفس الشخصيات ..
مهما حصل لحد النهارده .. انا بعشق القصص .. بعشق اني اسرح بخيالي انا .. خيالي اللي بيصنع الأحداث و بيصور الشخصيات  .. و لو احسن مخرج في العالم مش حيعرف يرسم الصورة اللي بتتكون في خيالي أبداً .. حاولت مرة افهم ليه فيه قصص بتبقي عالمية .. و تنفع لأذواق الناس كلها .. إكتشفت ان الحكاية في التخيل.. انك تتخيل البطل بطريقة غيرك ممكن يتخيلها بطريقة تانية .. 
الميديا المرئية موتت الخيال .. لكن البطل اللي جوايا لسه فاكره .. و لسه موجود ورا ستار عقلي مستني بس إستدعاءه .. مش غريبه فعلا .. لما اصحابي كانوا بيستغربوا لما تيجي الاجازة عليا كنت بجري ع القصص ليه .. بدل ما العب كورة و لا ااجر عجل في الشارع .. ولا كانت بتحلي ليه المذاكرة و انا مداري القصة بكتاب المدرسة .. آل يعني بذاكر:) 
ياتري انت بطلك كان مين ..؟ و لسه فاكره ..؟ و لا رميته في ركن بعيد من عقلك .. و عايش من غيره ..؟  نصيحة ليك .. إرجع اقرا كل اللي كنت بتقراه و انت صغير و متتكسفش .. منطقة عندك حتنور .. وممكن تنورلك حياتك كلها .. لو خدت الحكاية ببساطه .. زي ما بيخدوها أبطال القصص تمام ..